Германиянын Fleckvieh породасындагы асыл тукум малды КРда көбөйтүү талкууланды

Кыргызстанда сүт жана эт багытындагы жогорку өндүрүмдүү Fleckvieh породасындагы малды көбөйтүү жана генетикалык сапатын жакшыртуу маселелери талкууланды. Бул тууралуу Суу ресурстары, айыл чарба жана кайра иштетүү өнөр жайы министрлиги билдирди.

Маалыматка ылайык, аталган министрдин орун басары Мирбек Дүйшеев Германиянын Bayern-Genetik GmbH компаниясынын өкүлдөрү жана “Токбай Агро” ишканасынын жетекчиси Арсен Джанов менен жолугушту.

Жолугушууда малды жасалма уруктандыруу технологияларын өнүктүрүү, асыл тукум мал чарбачылыгы боюнча адистерди даярдоо маселелери каралды. Ошондой эле Германиядан асыл тукум бука уругун импорттоо жана Бавариядагы мал чарба ишканаларынын тажрыйбасын үйрөнүү мүмкүнчүлүктөрү талкууланды.

Тараптар кызматташтыкты өнүктүрүүгө жана жетишилген макулдашууларды иш жүзүндө жүзөгө ашырууга кызыкдар экендиктерин билдиришти.