Парламентте сүткө туруктуу баа коюу маселеси көтөрүлдү
Сүт өндүрүүчү Айгүл Нурумбетова Жогорку Кеңештин каржы, бюджет, ишкердик жана атаандаштыкты өнүктүрүү боюнча комитетинин жыйынында кайра иштетүүчү ишканалар сүттү бирдиктүү баа менен кабыл алышын камсыздоону суранды.
Сүттүн баасын жөнгө салуу маселеси талкууланган учурда, баа өндүрүүчүлөр жана тиешелүү мамлекеттик органдар кирген комиссия тарабынан продукциянын майлуулугу эске алынып белгиленери айтылды. Ар кайсы райондордо жана аймактарда сатып алуу баасы ар башка болуп, 28 сомдон 42 сомго чейин өзгөрүшү мүмкүн.
"Сүттүн баасы кескин түшүп кетти. Айрым үй-бүлөлөр балдарына бир кашык да сүт калтырбай, баарын өткөрүп жатышат, анткени азык-түлүк сатып алуу, бала бакчага төлөө жана башка чыгымдар бар. Биз заводдордон жайкы жана кышкы баа деп бөлбөстөн, 40–45 сом өлчөмүндө бир туруктуу баа коюуну суранабыз. Тоют да кымбаттап жатат, ал эми сүттүн баасы төмөндөөдө", — деди ал.
Ошондой эле ал сүттүн баасы мындан ары да төмөндөй берсе, жарандар президентке жана УКМКнын төрагасына кайрылууга аргасыз болорун билдирди.
Ал эми "Талас Даамы" ЖЧКсынын жетекчиси Бактыбек Тууганбаев тармактагы дагы бир көйгөйгө токтолду. Анын айтымында, Талас облусунда бир уй күнүнө орто эсеп менен 8 литр сүт берсе, Россияда — 15 литр, Беларуссияда — 20 литрге чейин жетет.
"Бизде өндүрүмдүүлүктү жогорулатуу керек. Суу ресурстары, айыл чарба жана кайра иштетүү өнөр жайы министрлиги муну кандай жол менен ишке ашырууга болорун карап чыгышы зарыл. Уйлардын породасын жаңылап, көбүрөөк сүт бере турган породаларды алып келүү керек", — деп эсептейт ишкер.
