Европа парламенти Украинага 90 млрд евро пайызсыз насыя берүүнү жактырды
Европа парламенти Украинага 2026–2027-жылдарга 90 млрд евро өлчөмүндө насыя берүү чечимин жактырды. Бул чечимди 458 евродепутат колдоп, 140 депутат каршы добуш берди, деп билдирет AFP.
Европарламенттеги добуш берүү насыяны бекитүүнүн акыркы этабы болду.
Евробиримдиктин (ЕБ) өлкө лидерлери Украинага пайызсыз насыя берүү тууралуу 2025-жылдын декабрында макулдашкан. Насыя ЕБнин капитал рынокторунан алган карыз каражаттарынын эсебинен каржыланып, башында сунушталгандай Россиянын активдерин колдонбостон, Евробиримдиктин бюджети менен камсыздалат. Насыя Россия Украинага репарация төлөгөн учурда кайтарылышы керек.
Бөлүнгөн каражат эки бөлүккө бөлүнөт: 60 млрд евро аскердик сатып алууларга, ал эми 30 млрд евро өлкөнүн бюджетин колдоого жумшалат. Биринчи төлөм Киевге 2026-жылдын экинчи кварталынын башында түшөрү күтүлүүдө.
