Уюлдук телефон саткан дүкөндөн 65 миң доллар уурдагандар кармалды
Кара-Суу районунда уюлдук телефон саткан дүкөндөн 65 миң доллар уурдоого шектелгендер кармалганын Ош облустук ички иштер башкармалыгы билдирди.
Милициянын маалыматына ылайык, 2026-жылдын 25-февралында ички иштер органдарына 1996-жылы туулган К.Ж. аттуу жаран кайрылган. Ал 22-февралдан 23-февралга караган түнү белгисиз адамдар дүкөнгө кирип, 65 миң доллар уурдап кеткенин билдирген.
Бул факт боюнча Кыргыз Республикасынын Кылмыш-жаза кодексинин 205-беренеси ("уурулук") менен кылмыш иши козголуп, тергөө амалдары башталган.
Ыкчам-издөө иш-чараларынын натыйжасында кылмышка шектүүлөр — 2009-жылы туулган М.Н., 2001-жылы туулган М.М. жана 2004-жылы туулган К.Т. кармалды. Алар Ош жана Бишкек шаарларында жашырынып жүрүшкөн.
Тергөө аныктагандай, уурдалган акчаны шектүүлөр өз ара бөлүшүп алышкан. Каражаттын жарымына жакынын Бишкектен автоунаа сатып алууга жумшашкан, калганын жеке муктаждыктарына коротушкан.
Учурда кармалгандардын башка кылмыштарга тиешеси бар-жогу текшерилүүдө. Тергөө уланууда.
