Мал чарбачылыгындагы өндүрүмдүүлүктү кантип жогорулатабыз?
Кыргыз мал чарба жана жайыт илим-изилдөө институтунда мал чарбасындагы кайра өндүрүү биотехнологияларын өнүктүрүүгө арналган тегерек стол өттү.
Иш-чаранын алкагында Кыргыз Республикасында мал чарба тармагында колдонулуп жаткан заманбап ыкмалар, анын ичинде жасалма уруктандыруу жана эмбриондорду трансплантациялоо технологиялары талкууланды. Катышуучулар тармакты мындан ары өнүктүрүү, өндүрүмдүүлүктү жогорулатуу жана эл аралык тажрыйбаны кеңири колдонуу боюнча пикир алышты.
Тегерек столго мамлекеттик органдардын өкүлдөрү, илимий кызматкерлер жана эл аралык өнөктөш уюмдардын өкүлдөрү катышты. Алардын катарында тиешелүү министрликтин өкүлдөрү, Кыргыз мал чарба жана жайыт илим -изилдөө институту, ошондой эле Дүйнөлүк банк, ARIS, KOICA, KOPIA жана AFACI уюмдары болду.
Анда жасалма уруктандыруунун учурдагы абалы, эмбрион трансплантациясынын технологиялары жана алардын Кыргызстандын шартында колдонуу мүмкүнчүлүктөрү кеңири каралды. Ошондой эле мал чарбасын өнүктүрүүнүн стратегиялык багыттары боюнча сунуштар берилди.
Иш-чара мал чарба тармагына инновациялык технологияларды киргизүүдө маанилүү аянтча болуп, адистер ортосунда тажрыйба алмашууга өбөлгө түздү.
