Айыл чарба министрлигинин иш пландары тууралуу талкуу өттү
Жогорку Кеңештин Агрардык саясат, суу ресурстары, жер казынасын пайдалануу, экология жана айлана-чөйрөнү коргоо боюнча комитетинин көчмө жыйыны Суу ресурстары, айыл чарба жана кайра иштетүү өнөр жайы министрлигинде өттү. Бул тууралуу парламенттин басма сөз кызматы билдирди.
Маалыматка ылайык, Суу ресурстары, айыл чарба жана кайра иштетүү өнөр жайы министрлигинин 2025-жылдагы ишмердүүлүгү жана 2026-жылда аткара турган иш пландары тууралуу маселе каралып, бул багытта министрдин биринчи орун басары Илич Марсбек уулу баяндама жасады.
2026-жылы министрликке 44 миллиард 758 миллион сом каралса, учурда анын 20%ы, тактап айтканда 9 миллиард 347 миллион сому өздөштүрүлгөн. Жер айдоо иштери 30%га аткарылып, 386 миң гектар жер айдалган.
Депутат Нилуфар Алимжанова аймактардагы министрликтин бөлүмдөрүнүн ыйгарым укуктарын кеңейтүү, штаттык бирдиктерди көбөйтүү боюнча реформаларды илгерилетүү жана дыйкандардын түшүмүн экспортко чыгарууда жаралган тоскоолдуктарды жоюу маселелерин көтөрдү.
Жыйынтыгында комитет айтылган бардык сунуш-пикирлерди эске алуу менен тиешелүү чечим кабыл алды.
