Мыйзамсыз унаа киргизгендер кармалып, мамлекетке 6,2 млн сом төлөндү
Мамлекеттик бажы кызматынын кызматкерлери тарабынан “Кант” убактылуу сактоо кампасынан транспорт каражаттарды мыйзамсыз алып чыгуу фактысы аныкталды. Бул тууралуу бажы кызматынын басма сөз кызматынан билдирди.
Маалыматка ылайык, Европа биримдигинин өлкөлөрүнөн бажы транзити жол-жобосу менен киргизилген “VOLVO” үлгүсүндөгү жүк ташуучу унаалар жана “WIELTON” үлгүсүндөгү чиркегич транзит аяктагандан кийин бажылык тариздөө жана бажы төлөмдөрү төлөнгөгө чейин сактоодо турууга тийиш болгон.
Андан ары инвентаризация жүргүзүү учурунда аталган транспорт каражаттарынын кампада жок экендиги аныкталган. Текшерүүнүн жыйынтыгында транспорт каражаттары ээлеринин өкүлүнүн катышуусунда бажылык тариздөөсүз жана бажы төлөмдөрү төлөнбөстөн мыйзамсыз чыгарылып кеткендиги белгилүү болду.
Ошол эле күнү Токмок шаарында чет өлкөлүк мамлекеттик номерлери бар төрт жүк ташуучу унаа табылып, кармалган. Транспорт каражаттары кайра кампага киргизилди.
Төлөнбөй калган бажы төлөмдөрүнүн суммасы 6,2 млн сомду түзгөн. Материалдар тергөө башкармалыгына өткөрүлүп берилди. Мамлекетке келтирилген 6 294 455 сом өлчөмүндөгү зыян толугу менен өндүрүлдү.
