Көчкү алдында калган турист куткарылды
Кумтөр кенинде иштеген жумушчулар көчкүнүн алдында калган чет элдик туристтерди куткарып калышты. Ишканадан билдиришкендей, 4-майда саат 12:35дер чамасында Кумтөр кенинин коопсуздук кызматынын диспетчердик бөлүмүнө туристтик гиддерден билдирүү түшкөн. Алар кенден 23-чакырым аралыкта кар көчкү алдында Италиядан келген беш турист калганын билдиришкен.
Окуя болгон жерге Кумтөрдүн куткаруу кызматы медициналык бригада менен дароо жөнөтүлгөн. Ошол эле учурда Кумтөрдүн коопсуздук кызматы маалыматты ыкчам түрдө Өзгөчө кырдаалдар министрлигине билдирген.
Кумтөрдүн кызматкерлери дрондор менен аймакты алгачкы текшерүүдөн өткөрүшкөн. Италиялык төрт турист жеңил жаракат алып, стресс абалында болушкан. Аларга ошол жерде тийштүү жардам көрсөтүлгөн. Ошол эле маалда бешинчи туристтин жайгашкан жерин аныктоо боюнча издөө-куткаруу иштери башталган. Саат 16:24төр чамасында ал табылган.
Турист ар кандай жеңил жаракат алган. Ошондой эле моюнунан да жараат алган. Чет элдик жаран ӨКМдин кызматкерлерине өткөрүлүп берилди.
