Бостериде мыйзамсыз кум казуу фактысы аныкталды

24-июнга караган түнү Ысык-Көл облусунун Бостери айылындагы токой тилкесинде мыйзамсыз кум казуу фактысы катталды. Бул тууралуу Экологиялык жана техникалык көзөмөл кызматы билдирди.

Маалыматка ылайык, түнкү рейд учурунда тескөөчүлөр мыйзамсыз казылып алынган кумду ташып бара жаткан үч оор жүк ташуучу “Howo” үлгүсүндөгү унааны токтотушкан.

Транспорт каражаттары айып короого киргизилип, окуя боюнча чогултулган материалдар укук коргоо органдарына өткөрүлүп берилди. Ошондой эле факт тиешелүү каттоо журналына расмий катталды.

Алдын ала маалыматтарга караганда, мыйзам бузгандар кумду казып алып, пайда болгон чоң чуңкурларды курулуш таштандылары менен толтуруп, үстүн жука катмар кум менен жаап, мыйзамсыз аракеттерин жашырууга аракет кылышкан.

Учурда келтирилген экологиялык зыяндын көлөмү такталып, окуя териштирилип жатат.