Кыргызстанда электр энергиясын керектөө эң жогорку көрсөткүчкө жетти
29-июнда өлкөнүн энергосистемасындагы суткалык электр энергиясын керектөө 47 млн 112 миң кВт/саатка жетти. Бул тууралуу “Кыргызстан улуттук электр тармагы” ачык акционердик коому билдирди.
Ишкананын маалыматына караганда, бул — жай мезгилинде катталган тарыхтагы эң жогорку көрсөткүч. Салыштыруу үчүн, 2025-жылдын 29-июнунда керектөө болжол менен 40 млн кВт/сааттын тегерегинде болгон.
Компания электр энергиясын керектөөнүн өсүшүн жаңы көп кабаттуу үйлөрдүн курулушу, социалдык мекемелердин жана өнөр жай объекттеринин көбөйүшү менен байланыштырууда.
Керектөөчүлөрдүн саны жыл сайын орточо 30 миң абонентке өсүп жатат. Ушуга байланыштуу ишкана калкты электр энергиясын үнөмдүү пайдаланууга чакырып, колдонулбай турган тиричилик шаймандарын өчүрүп турууну эскертти.
Расмий маалыматтарга ылайык, Кыргызстан 2026-жылы жалпы 19,6 млрд кВт/саат электр энергиясын керектейт деп божомолдонгон. Анын 15,7 млрд кВт/сааты өлкө ичинде өндүрүлсө, калган 4 млрд кВт/сааты коңшу мамлекеттерден импорттолот.
Адистердин айтымында, Кыргызстан өзүндө өндүрүлгөн электр энергиясы ички керектөөнү толук жаппагандыктан, күз-кыш мезгилдеринде Казакстан, Түркмөнстан, Өзбекстан жана Орусиядан электр энергиясын сатып алууга туура келет.
