VI Дүйнөлүк көчмөндөр оюндары: негизги иш-чаралар кайда жана качан өтөт?

VI Дүйнөлүк көчмөндөр оюндарынын ачылыш аземи Бишкек шаарындагы “Бишкек аренада” башталып, негизги бөлүгү 2026-жылдын 1–6-сентябрында Ысык-Көл облусунда өтөт. Оюндардын расмий программасы бекитилип, ага спорттук мелдештерден тышкары маданий жана илимий иш-чаралар да киргизилди.

Иш-чаранын негизги аянтчалары

• Курманжан Датка атындагы Көчмөндөр цивилизациясы борбору: 1–6-сентябрга чейин бул жерде "Улуу тоолордун баяны" аттуу көркөм сүрөт көргөзмөсү, сүрөт тартуу, карапа жасоо жана скульптура боюнча мастер-класстар, ошондой эле от-жалындын шоусу өткөрүлөт. 3-сентябрда "Көчмөн цивилизациялар: мурас, парадигмалар жана келечек" аттуу эл аралык илимий конференция өтөт.
• Чолпон-Ата ат майданы жана “Көк бөрү” аренасы: Ипподромдо 1–4-сентябрь аралыгында “Көчмөндөр жаңырыгы” эл аралык этно-ыр фестивалы, 4-сентябрда улуттук ат чабыштар жана 6-сентябрда оюндардын жабылуу аземи өтөт. 2–6-сентябрь аралыгында “Көк бөрү” аренасында ат чабыш мелдештери, эр эңиш, тыйын эңмей жана көк бөрүнүн финалдык беттештери өтөт.
• Кырчын жайлоосу — "Көчмөндөр ааламы" этношаарчасы: 2–5-сентябрда "Көчмөндөр ааламы: жандуу мурас" аттуу ачылыш аземи өтөт. Ошондой эле боз үйдү тез тигүү боюнча мелдеш, этно-ырлар сынагы, акындардын айтышы жана Кыргызстандын облустарынын салт-санаасын тааныткан көрсөтүүлөр уюштурулат. Мындан тышкары, ордо, жаа атуу, таяк тартыш, салбурун жана алыс аралыкка ат чабыш боюнча спорттук мелдештер өтөт.
• Чыңгыз Айтматов атындагы "Рух Ордо" маданий борбору: 2–5-сентябрда бул жерде "Көчмөндөр санаты" аттуу эл аралык салттуу музыка фестивалы өтөт. Анын алкагында манасчылар, аспапчылар жана ырчылар арасында сынактар уюштурулат.
• "Дордой-Номад" комплекси: 2–5-сентябрда аянтта Nomad Fest фестивалы, этно-мода көрсөтүүлөрү, кол өнөрчүлөрдүн мастер-класстары жана жарманке өтөт.
• "Газпром" ден соолукту чыңдоо комплекси жана "Евразия" отели: "Газпром" комплексинде алыш, күрөш, кыргыз күрөшү, самбо жана башка күрөш түрлөрү боюнча мелдештер өткөрүлөт. Ал эми "Евразия" отелинде тогуз коргоол, овари жана мангала боюнча интеллектуалдык оюндар уюштурулат.

Иш-чарага кирүү жеткиликтүүлүгү

Кырчын жайлоосундагы, "Газпром" ден соолукту чыңдоо комплексиндеги, "Евразия" отелине, Көчмөндөр цивилизациясынын борборундагы иш-чараларга жана ошондой эле ат майданындагы күндүзгү ат чабыштарды көрүү акысыз болот. Ал эми "Рух Ордо" жана "Дордой-Номад" фестивалдарына, "Көчмөндөрдүн жаңырыгы" концерттерине, көк бөрү боюнча финалдык оюндарга жана ат майданындагы жабылыш аземине кирүү билет менен жүргүзүлөт. Билеттер nebs.gov.kg сайтында сатылат. Ал эми эл аралык илимий конференцияга катышуу атайын тизме боюнча жүргүзүлөт.