Кыргызстан менен Казакстан дары-дармектерди биргелешип сатып алууну талкуулады
"Кыргызфармация" мамлекеттик ишканасында Казакстандын бирдиктүү дистрибьютору "СК-Фармация" компаниясынын өкүлдөрү менен жумушчу жолугушуу өттү. Бул тууралуу аталган мекемеден билдиришти.
Маалыматка ылайык, жолугушууда тажрыйба алмашуу, дары-дармектерди борборлоштурулган сатып алуу жана эки тараптуу кызматташтыкты өнүктүрүү маселелери талкууланды.
Тараптар 2027-жылга дары-дармек каражаттарын жана медициналык буюмдарды биргелешип сатып алуу мүмкүнчүлүгүн карашты.
Ошондой эле логистика, баа түзүү жана калкты дары-дармек менен үзгүлтүксүз камсыз кылуу боюнча орчундуу маселелер көтөрүлдү.
Жыйынтыгында тараптар кызматташтыктын жаңы багыттарын аныктап, калкты сапаттуу жана жеткиликтүү дары-дармек менен камсыз кылуу боюнча биргелешкен ишти улантууга макулдашты.
