Суусамыр – Талас – Тараз жолун реконструкциялоо иштери текшерилди
Транспорт жана коммуникациялар министринин орун басары Бактылуу Момбеков Талас облусуна болгон иш сапарынын алкагында Суусамыр – Талас – Тараз автомобиль жолунда жүргүзүлүп жаткан реконструкция иштеринин жүрүшү менен таанышты. Бул тууралуу министрликтин маалымат кызматы билдирди.
Иш сапардын жүрүшүндө жол куруу иштеринин сапатына, аткарылып жаткан жумуштардын көлөмүнө жана белгиленген мөөнөттөрдүн сакталышына көңүл бурулду.
Министрдин орун басары подрядчы компаниянын өкүлдөрүнө реконструкция иштерин сапаттуу жүргүзүп, жолду белгиленген мөөнөттө пайдаланууга берүүнү камсыз кылуу боюнча тапшырмаларды берди.
Ошондой эле курулуш жүрүп жаткан аймактарда чаңды азайтуу үчүн үзгүлтүксүз суу сээп туруу, жергиликтүү тургундарга ыңгайсыздык жаратпоо жана жол кыймылынын коопсуздугун камсыз кылуу тапшырылды.
