“Тамчы” АФИТ Дубайдагы AIM Congress форумуна өнөктөш болду
Кыргызстандын “Тамчы” атайын финансылык-инвестициялык аймагы (АФИА) 7–9-сентябрда Дубайда өткөн 15-эл аралык инвестициялык AIM Congress форумуна расмий өнөктөш катары катышты.
Кыргызстандын делегациясын “Тамчы” АФИТ башкаруу кеңешинин төрагасы Аяз Баетов жетектеди. Форумдун алкагында мамлекеттик органдардын, эл аралык уюмдардын, каржы институттарынын жана ири компаниялардын өкүлдөрү менен бир катар жолугушуулар өттү.
Жолугушууларда “Тамчы” АФИАнын укуктук жана институционалдык модели, ошондой эле Кыргызстандын жана Борбор Азиянын инвестициялык мүмкүнчүлүктөрү тааныштырылды. Аймактын укуктук модели англиялык жалпы укуктун принциптерине негизделип, көз карандысыз жөнгө салууну, өз алдынча сот тутумун, санариптик башкарууну жана өзгөчө салык режимин камтый турганы белгиленди.
Ошондой эле “Тамчы” АФИА менен Перс булуңундагы өлкөлөрдүн финансылык борборлорунун ортосунда кызматташтыкты өнүктүрүү жана эл аралык компанияларды Кыргызстандагы жана Борбор Азиядагы долбоорлорго тартуу маселелери талкууланды.
AIM Congress быйыл 15-жолу өтүп, ага 100дөн ашуун өлкөдөн 15 миңден ашык өкүл катышты.
Белгилей кетсек, “Тамчы” АФИА 2025-жылдын 10-июлундагы №136 мыйзамынын негизинде түзүлгөн. 2035-жылга чейин аймакта 3 900дөн ашык компанияны жайгаштыруу жана 10 миңден ашуун жумуш орду түзүлмөкчү. Ал англис мыйзамдарынын принциптерине негизделген жана эл аралык жөнгө салуунун мыкты тажрыйбаларын колдонуу менен өзгөчө юрисдикцияга ээ - аймак болуп саналат.
