Окуу жайына электромобиль жасаган жаш жаратман менен маек
Жалал-Абад мамлекеттик университетинин 2-курсунун студенти Алихан Кимсанбаев окуу жай үчүн электромобиль жасап, 21-октябрда жаңы унаанын бет ачары өткөн.
Алгач ал долбоор даярдап, университет жетекчилигине сунуштаган. Колдоо таап, каражат бөлүнгөндөн кийин ишке киришкен.
"Ишкер" медиа сайты жаш жаратманга жана мугалими Жолон Аскаровго байланышып, долбоорлук иши, пландары тууралуу сурады.
— Алихан мырза, электромобилди кантип жасап калдыңыз? Идея эмнеден улам келди эле?
— Кичинекей кезимден эле автоунааларга кызыгып, бул тууралуу кыялданар элем. Үйдө болгон буюмдарды чачып, ичиндегилерди карай берет болчум. Кийинчерээк чакан унааларды жасап баштадым.
Колледжде окуп жүргөндө электромобиль жасоо боюнча долбоор чыгып калды. Аны электр тогу жана Күн панелинен энергия алып жүрө тургандай кылып жасадык.
— Аталган долбоорго канча каражат сарпталды?
— Бул долбоорду апрелдин аягында алганбыз. Ал үчүн окуу жай 280 миң сом бөлүп берген. Май, июнь айында керектүү тетиктерди буюртма берип, изилдеп, даярдык иштерин көрдүк. Андан кийин автоунааны кураштырып баштадык.
Долбоордук иште көмөк көрсөткөн ЖАМУнун Жалал-Абад колледжинин мугалими Жолон Аскаровдун айтымында, унаага керектүү тетиктердин айрымдарын Кытайдан алдырышкан.
"Ушул жылдын апрель айында Манас шаарында жаштар форуму болгон. Ал жерде чакан унаалардын макетин көргөзмөгө койгонбуз. Иш-чарада тийиштүү жетекчилер тарабынан бул унаанын чоңун жасоо боюнча сунуш айтылган. Андан чоң долбоордун сметасы даярдалып, окуу жайдан каражат бөлүндү. Унааны 3 айдын ичинде жасап бүттүк. Жумуштар окуу жайдын устаканасында ишке ашырылды", - деди ал.
Аскаров мындай долбоорлор алдыда дагы улантыларын, эми робот тармагына көңүл бурууну көздөп жатышканын белгиледи.
"Буга чейинки долбоорлорубузда жашыл энергетикага көңүл буруп жатканбыз. Бул дагы алардын уландысы болду. Унаанын макетин жасаганда Күн панелинен заряд алары кошулган эмес. Анткени ал чакан болгону үчүн электр тогу менен гана жүрө турган болчу. Кийинчерээк Күн панелинен энергия алууну да коштук", - деп билдирди ал.
Илим министрлигинин маалыматына ылайык, учурда окуу жайдын жетекчилиги Кимсанбаевди Кытайдагы автоунаа чыгаруучу ишканаларга алып барып, тажрыйбасын арттырууну көздөп жатат.
Эми электромобиль университетке келген конокторду окуу жайдын аймагында кыдыруу үчүн пайдаланылат. Бул окуу жайдын алгачкы электромобили экени айтылды.
