Өлкөдө 1 500дөн ашык медицина кызматкери окутуудан өттү
Өлкөдө неонатология боюнча 23 клиникалык протокол жана сунуштама киргизилип, 1 500дөн ашык медицина кызматкери балдар ооруларын интеграцияланган түрдө жүргүзүү боюнча окутуудан өттү. Бул тууралуу Саламаттык сактоо министри Дамир Осмонов Самаркандагы балдар темасына арналган Дүйнөлүк саммиттин пленардык жыйынында айтты.
Анын айтымында, алыскы аймактарда медициналык кызматтардын жеткиликтүүлүгүн жогорулатуу максатында Telemed.kg платформасы аркылуу телемедицина өнүктүрүлүүдө.
Учурда ал Жалал-Абад, Баткен жана Ош облустарынын 11 районун камтыйт.
Өлкөдө онкологиялык оорусу бар балага аутологиялык сөөк чучугун трансплантациялоо операциясы жасалган. Ошондой эле 2018-жылдан бери угуусу олуттуу бузулган балдарга 200дөн ашык кохлеардык имплантация жүргүзүлгөн. Неонаталдык скринингди, эрте кийлигишүү кызматтарын жана реабилитациялык жардамды өнүктүрүү иштери улантылууда.
Министр Осмонов саламаттык сактоо системасын туруктуу өнүктүрүү үчүн айыл менен шаарда бирдей жеткиликтүү кызмат көрсөтүү зарылдыгын белгиледи.
