Манас шаарында "Тазалык" ишканасынын кызматкерлери иш таштады
Манас шаарында "Тазалык" ишканасынын кызматкерлери иш ташташты. Алар Region телеканалына маянасы аз экенин, аны убагында алалбай жатышканын, кошумча жумуштар үчүн каралган акча берилбегенин айтышкан. "Тазалык" ишканасынын жетекчиси Байгазы Эргешов 31-август үчүн кошумча каражат кечиккенин моюндап, мэрияга караштуу ишкана болгондуктан каражатты өз алдынча иштете албай турганын белгиледи.
"2026-жылдын башында биздин кызматкерлердин маянасына 5000 сомдон кошулган. Өзүбүздүн атайын эсептен кошконбуз. Азыр колго тийгенде 30 миңдин тегерегинде акча алышат. Мурдагы жылдары да айлыктарына каражат кошулган. Быйыл биз муниципалдык кызматка кирбей калгандыктан коэффицент көтөрүлгөн, сентябрдын маянасы эми кайра эсептелип которулат", - деди жетекчи.
Аталган маселе боюнча Манас шаардык мэриясынан редакцияга комиссия түзүлгөнүн билдирди.
Маалым болгондой, шаар мэри Уларбек Исмаилов "Тазалык" муниципалдык ишканасынын нааразычылык билдирген кызматкерлерин кабыл алып, жолукту. Анда кызматкерлердин жетекчиликке карата айтылган дооматтарын кароо үчүн атайын комиссия түзүлүп, текшерүүнүн жыйынтыгы менен тиешелүү чечимдер кабыл алынары белгиленди.
"Шаар мэри комиссиянын жыйынтыгы чыкканга чейин кызматкерлерди өз милдеттерин үзгүлтүксүз аткарууга жана шаардын тазалыгын камсыз кылууга чакырды", - дешти мекемеден.
