Кыргызстан санарип валютасын чыгарат
Президент Садыр Жапаров бүгүн Binance компаниясынын маркетинг боюнча глобалдык директору Рейчел Конланды кабыл алды.
Президенттин маалымат кызматынан билдиришкендей, жолугушууда виртуалдык активдер жана блокчейн технологиялары негизинде санариптик экономиканы өнүктүрүү маселелери талкууланды.
Өлкө башчы билдиргендей, учурда Виртуалдык активдер жана блокчейн технологиялары боюнча улуттук кеңештин Катчылыгы сомго байланган KGST санариптик активин иштеп чыгууда.
Улуттук банк менен биргеликте мамлекеттик электрондук валюта - санарип сом долбоору боюнча платформасынын демо-версиясы сыноо режиминде иштөөдө. Жакын арада долбоор реалдуу маалыматтар менен тестирлөө стадиясына өтөт.
Келечекте санарип сомду жана KGST активин интеграциялоо аркылуу өлкө ичиндеги жана эл аралык төлөмдөрдү жөнөкөйлөтүү пландалууда.
Binance өкүлү Рейчел Конлан компания бул демилгени колдоого даяр экенин белгилеп, Кыргызстан менен узак мөөнөттүү өнөктөштүк, билим берүү жана технологиялык долбоорлорду ишке ашырууга кызыкдар экенин билдирди.
