Улуттук банк Telegram колдонмосунда алдамчылык жүрүп жатканын эскертти
Telegram интернет колдонмосунда жасалма документтер менен алдамчылыктын жаңы схемасы чыгып жатканын Улуттук банктын маалымат кызматы билдирди.
Тагыраагы регулятор жарандарга Telegram мессенджеринде “Гулдари | Мамлекеттик жардам” (@Guldari_kredit_bot) жана “Гулдари / Социалдык кредит” (@credit_guldari_bot) боттору аркылуу алдамчылык схемасы таралыпы жатканын эскерткен.
“Алдамчылар Улуттук банк логотиби менен жасалма документтерди колдонуп колдонуучуларды ар кандай манипуляциялар менен насыя алууга ишендирип жатышат. Эгер жарандар алдамчылардын курмандыгы болгонун түшүнсө банктык картаны дароо блоктоп, укук коргоо органдарына кайрылуулары керек”,-делет банктын маалыматында.
Ошол себептен Улуттук банк мындай билдирүүлөргө ишенип, тааныш эмес адамдарга акча которбоого чакырып, эгер кандайдыр бир күмөн саноолор болсо маалыматты расмий булактар аркылуу текшерип коюуга чакырат.
