Улуттук банк: Кыргызстанда «Берекет Банк» ачылат
Кыргыз Республикасынын Улуттук банкы жаңы каржы мекемеси — «Берекет Банк» жабык акционердик коомун түзүүгө расмий уруксат берди.
Тиешелүү чечим 2025-жылдын 10-октябрында кабыл алынганын Economist.kg сайты Улуттук банктын басма сөз кызматына шилтеме берүү менен жазды.
Азырынча жаңы банктын негиздөөчүлөрү тууралуу маалыматтар Юстиция министрлигинин ачык базаларында жарыялана элек.
«Берекет Банк» — соңку айларда Улуттук банк тарабынан түзүүгө уруксат берилген бешинчи банк болуп саналат. Буга чейин, 2025-жылдын август айында Улуттук банк «Алма Финанс Банк», «Мурас Банк», «Асман Банк» жабык акционердик коомдорун ачууга уруксат берген.
Ал эми сентябрь айында «Кылым Банкы» ААКсын түзүүгө уруксат берген. Аталган банк мамлекеттин 100% катышуусунда түзүлүп, анын уставдык капиталы 1 миллиард сомду түзөт. Бул боюнча чечимди Министрлер Кабинети 2025-жылдын январь айында кабыл алган.
