Улуттук банк санарип валютаны өнүктүрүү багытында иш алып барууда
Улуттук банктын төрагасы Мелис Тургунбаев 13–18-октябрда Вашингтондо өткөн ЭВФ жана Дүйнөлүк банк тобунун жыйынына катышып, Борбор Азия өлкөлөрүнүн борбордук банктары менен глобалдык экономикалык чакырыктарды талкуулады. Бул тууралуу Улуттук банктын басма сөз кызматынан билдиришти.
Мелис Тургунбаев Англия, Египет жана Армения борбордук банктарынын жетекчилери менен бирге баяндама жасап, чакан экономикалар үчүн жаңы глобалдык реалдуулукка — күчөгөн протекционизм жана белгисиздик шарттарына ылайык иш алып баруу зарылдыгын белгиледи.
Ошондой эле ал криптоактивдер рыногунун өсүшүнө жана санариптик финансылык инструменттердин чакырыктарына токтолуп, Улуттук банк ачык-айкын акча жүгүртүүнү камсыздоо жана финансы системасынын туруктуулугун бекемдөө үчүн санариптик инфратүзүмдү, анын ичинде борбордук банктын санарип валютасын (CBDC) өнүктүрүп жатканын билдирди.
Тургунбаев санариптик активдерди жөнгө салууда жана тез өзгөрүп жаткан технологиялык шарттарда институттарды колдоодо Эл аралык валюта фондунун активдүү ролу маанилүү экенин да белгиледи.
