Мамлекеттик кызматтар үчүн ABilling төлөм платформасы сунушталды
Экономика жана коммерция министрлигинде мамлекеттик түзүмдөр үчүн иштелип чыккан жаңы төлөм системасы — ABilling расмий түрдө сунушталды. Бул тууралуу министрликтин басма сөз кызматы кабарлады.
Инновациялык санариптик чечимди "Айыл Банк" ААКтын өкүлдөрү тааныштырды. ABilling системасы төлөмдөрдү түзүү, каттоо жана башкаруу мүмкүнчүлүгүн берип, мамлекеттик мекемелер көрсөткөн кызматтар үчүн QR-код аркылуу төлөөгө шарт түзөт.
Жолугушууда аталган платформа министрликтин түзүмдөрүнө кандайча иштей турганы көрсөтүлүп, төлөм процессин жеңилдетүү жана автоматташтыруу мүмкүнчүлүктөрү баса белгиленди.
Маалыматка караганда, ABilling системасынын ишке киргизилиши мамлекеттик органдар менен жарандардын ортосундагы өз ара аракетти жөнөкөйлөтүп, төлөмдөрдү заманбап, ылдам жана ачык жүргүзүүгө көмөктөшөт.
