Улуттук банк 9 айда 33,2 млрд сом таза киреше тапты
Улуттук банктын таза кирешеси 2025-жылдын 9 айынын жыйынтыгы менен 33,2 млрд сомду түзүп, өткөн жылдын 9 айындагы таза кирешеден дээрлик 13 эсе көп болду.
Финансылык жөнгө салуучу органдын финансылык отчетунда кирешенин өсүшүнө валюталык активдер менен болгон операциялар жана алтынды кайра баалоо негизги себеп болгону айтылат.
Бул багыттар боюнча резервдер дээрлик үч эсеге көбөйүп 182 млрд сомго жеткен жана бул акыркы жылдардагы эң чоң өсүш болуп саналат.
Улуттук банктын финансылык абалы бекемделип, жалпы капитал 227,9 млрд сомго жеткен. Ал эми активдер менен милдеттенмелердин жалпы көлөмү 798 млрд сомдон ашты.
2025-жылдын 3-кварталынын акырына карата жүгүртүүдөгү банкноттордун жана монеталардын көлөмү 290 млрд сомду түзгөнү маалым болду. Бул бир жыл мурункуга караганда 55 млрд сомго көп дегенди билдирет.
