Улуттук банктын жаңы имаратынын ачылыш аземи болду
Бүгүн Президент Садыр Жапаров КРнын Улуттук банкынын жаңы имаратынын ачылыш аземине катышты. Жаңы имарат Бишкек шаарынын Калык Акиев көчөсү менен Киев көчөлөрүнүн кесилишинде жайгашкан.
Улуттук банктын бул кеңсеси, борбор калаанын Мамлекеттик архитектуралык-курулуш көзөмөлү департаменти жана "Бишкекглавархитектура" узак мөөнөттүү курулуш долбоорлорунун тизмесинде турган. Акыркы 2 жыл бою анын курулушу кызуу жүрүп, азыр ишке берилди.
Анын ачылыш аземинде сөз сүйлөп жатып, Президент эми алтынды сактоого да мүмкүндүк жаралгандыгын билдирди. Анын айтымында буга чейин сактоодо көйгөй жаралып келгендиктен, кыргыз алтыны чет өлкөлүк банктарда сакталчу. Эми Улуттук банктын өзүнүн кампасында 1000 тоннага чейин алтынды сактоого болот.
Улуттук банктын өкүлдөрү имаратты куруу учурунда инженердик изилдөө жүргүзүлүп, талапка ылайык сапаттуу, сейсмикалык жактан туруктуулугу 12 баллга жете тургандай бекем имарат тургузулгандыгын билдиришти.
