Кыргызстанда 300 миң сомго чейин күрөөсүз насыя берилет
Кыргызстанда бизнес 300 миң сомго чейин күрөөсүз насыя алса болорун Финансы министрлигинин ишкерликти өнүктүрүү фондунун кредиттик бөлүмүнүн жетекчиси Чыңгыз Сакенов билдирди.
Анын айтымында, фонд мындай насыяларды өндүрүш секторуна, кол өнөрчүлүк багыттарга жана айыл чарба продукцияларын кайра иштетүүгө берет. Каражаттык колдоо биринчи кезекте экспортко ыктаган ишкерлерге сунушталат. Программанын максаты – жумуш орундарын түзүу жана ички өндүрүштү стимулдаштыруу. Сакеновдун билдиришинче, бул каржылоону банк менен иштөө тажрыйбасы жоктор дагы ала алышат.
“Эң негизгиси салык кызматында катталып, ишкерлик патент же күбөлүк алыш керек. Бизде коммериялык банктардагыдай арыз берүүчүнүн узак мөөнөттүү ишмердүүлүк тажрыйбасы болуш керек деген талап жок”,-дейт ал. Буга улай ал документтердин толук пакети берилгенден кийин арыз беш күн ичинде каралат.
“Арыз берүүдө каттоо тууралуу документтерди, киреше тууралуу маалымат, ошондой эле сырьену сатып алуу жана кайра иштетүү жайларынын дареги көрсөтүлүшү керек. Биздин эксперттер ошол жакка барып арыз берүүчүнүн ишмердүүлүгүн баалайт”,-дейт Сакенов.
Фонддун шарты боюнча 300 миң сом кредит күрөөсүз, 500 миң сомго чейин – жөнөкөйлөтүлгөн кепилдик менен берилет, а 500 миңден 5 млн сомго чейин кыймылсыз мүлк түрүндө камсыздоо талап кылынат.
