Төрага Жапониядагы эмгектенген мекендештер менен жолукту
Жогорку Кеңештин төрагасы Марлен Маматалиев Жапониядагы расмий сапарынын алкагында аталган өлкөдө жашап, эмгектенип жана билим алып жаткан кыргызстандык мекендештер менен жолугушту. Жолугушууга Талант Мамытов баштаган “Ынтымак-Мекенчил” депутаттык тобунун мүчөлөрү жана Кыргызстандын Жапониядагы элчиси Эркинбек Осоев катышты.
Баарлашууда чет өлкөлөрдө жүргөн мекендештер менен байланышты чыңдоо, алардын укуктарын жана кызыкчылыктарын коргоо, ошондой эле Кыргызстан менен Жапониянын ортосундагы маданий-гуманитардык жана экономикалык кызматташтыкты өнүктүрүү маселелери талкууланды.
Төрага Марлен Маматалиев бардык расмий сапарларында мекендештер менен жолугушууга артыкчылык берерин белгилеп, дүйнөнүн кайсы бурчунда жүрбөсүн, ар бир кыргызстандык өлкөнүн ажырагыс бөлүгү экенин кошумчалады.
"Мекенден алыста жүрсөңүздөр да, жүрөгүңүздөр Кыргызстан деп согуп, элибиздин каада-салтын, тилин жана маданиятын сактап, өлкөбүздүн аброюн көтөрүп келесиздер", – деди төрага.
Жогорку Кеңештин Төрагасы чет өлкөлөрдө билим алып, кесиптик тажрыйба топтоп жаткан жаштардын дараметине да өзгөчө токтолуп, алардын билими жана тажрыйбасы Кыргызстандын келечектеги өнүгүүсү үчүн маанилүү экенин белгиледи.
Жолугушуунун жүрүшүндө мекендештер өздөрүн кызыктырган бир катар маселелерди көтөрүп, сунуш-пикирлерин билдиришти. Атап айтканда, чет өлкөлөрдө жашаган кыргызстандык жарандардын шайлоого талапкер катары катышуусуна мүмкүнчүлүктөрдү түзүү, Жапонияда кыргыз тилин унутпай, кыргызстандын тарыхты чагылдырган жаны тасмаларын көрсөтүүнү уюштуруу жана эки өлкөнүн ортосундагы визалык шарттарды жеңилдетүү маселелери да айтылды.
Ошондой эле JDS программасы аркылуу Жапонияга билим алууга келген жарандардын эмгек акысынын төлөнүшүнө байланышкан маселелер, негизи эле билим алууга келген студенттердин маселесин, жапон инвесторлору үчүн Кыргызстанда жагымдуу шарттарды түзүү жана чет өлкөдө эмгектенген жарандардын пенсиялык чегерүүлөрүнө байланышкан жагдайлар көтөрүлдү.
Төрага айтылган ар бир сунуш-пикирге жооп берип, анын ичинен шайлоо мыйзамдарына айтылгандай өзгөртүүлөр киргизилип жатканын, JDS программасы менен окууга кеткендердин айлык маянасын төлөп берүү маселелери сөзсүз каралып чыгарын кошумчалады.
Андан сырткары төраганын колдоосу менен жакынкы аралыкта Жапонияда кыргыз кинолору көрсөтүлүп, мекедештердин ынтымагын арттыруу максатында атайын иш-чара уюштурулары жана анда кыргыз тилиндеги китептер да берилери айтылды.
