Улуттук банк быйыл 590,5 млн долларга 6 интервенция жасаганы маалым болду
Улуттук банктын төрагасынын орун басары Азат Козубеков Кыргызстандын экономикалык активдүлүгү жогорку деңгээлде уланып, өсүүлөр экономиканын дээрлик бардык тармактарында катталганын брифингде билдирди.
"Кыргызстандагы реалдуу эмгек акынын өсүшү, башкача айтканда, инфляцияны эске алганда 10,9 пайызды түздү. Ошону менен бирге, акча которуулардын өсүшү 24,1 пайыз деңгээлинде болду. Улуттук банк биринчи кезекте экономикадагы акча сунушун колдо болгон инструменттер аркылуу активдүү жөнгө салууну улантып жатат", — деди ал банктын чаралары жөнүндө айтып жатып.
Козубеков белгилегендей, ички валюта рыногу учурда туруктуу болуп, алмашуу курстарынын ийкемдүүлүгү рынок шартына ылайык сакталып жатат.
"Ушул жылдын башынан бери алмашуу курсунун кескин өзгөрүшүн жөнгө салуу максатында Улуттук банк жалпы суммасы 590,5 млн долларды түзгөн алты интервенция өткөрдү. Бирок бул интервенциялар менен катар октябрдын аягына карата эл аралык резервдердин көлөмү өсүүнү улантып, 7,96 млрд долларга жеткенин белгилей кетүү керек", - деп билдирди Улуттук банктын төрагасынын орун басары.
