Быйыл 111 акча алмашуу бюросунун лицензиясы токтотулду
Улуттук банктын банк эмес финансы кредиттик мекемелерди көзөмөлдөө башкармалыгын инспекторлору ИИМдин жана МСКнын өкүлдөрү менен биргеликте 2025-жылдын ичинде чет өлкө валюталарын алмаштыруучу бюролордун ишмердүүлүгүнө үзгүлтүксүз текшерүү жүргүзүп жатты.
Улуттук банктын расмий сайтынын маалыматына караганда, текшерүүнүн жыйынтыгында 460 буйрук жөнөтүлдү; 111 алмашуу бюросунун лицензиясы токтотулду; 12 бюронун лицензиясы кайтарылып алынды. Мындан сырткары 112 алмашуу бюросуна айып пул салынып, анын жалпы суммасы 6,16 млн сомду түздү. Ошондой эле лицензиясы жок валюта алмаштыруу менен шугулданган 152 жаранга айып пул салынды.
Азыркы тапта Улуттук банктын лицензиясына ээ болгон 820 акча алмаштыруу бюросу бар. Эгерде жарандардын акчасын алмаштырууда кандайдыр бир мыйзам бузуулар аныкталса, Улуттук банкка 31-30-08 телефон номурлары менен же mail@nbkr.kg дареги аркылуу билдирүү жөнөтүү сунушталат.
