Улуттук банк быйыл 10 айда мыйзам бузгандарга 8,8 млн сомго санкция колдонду
Улуттук банк 2025-жылдын 4-ноябрына карата валюталык рыноктун абалы боюнча отчетун жарыялап, мыйзам бузгандарга карата жалпы 8,8 млн сомго санкциялар колдонулганын билдирди.
Регулятордун маалыматына караганда, өлкөдө мыйзам чегинде 820 алмашуу бюросу иштеп жатат. Алардын ишин көзөмөлдөө эки түрдө жүргүзүлөт: аралыктан жана жеринде текшерүү учурунда. Легалдуу жайлар күн сайын өздөрүнүн алмаштыруу курстары жана операциялардын саны боюнча онлайн-портал аркылуу отчет берип турууга милдеттүү.
Лицензиясыз иш жүргүзгөндөрдү аныктоо үчүн ИИМ жана Салык кызматынын өкүлдөрүнүн катышуусунда рейддер жүрүп турат. 2025-жылы көзөмөл органы өзүнүн чара көрүү аракеттерин күчөтүп, текшерүүлөрдүн жыйынтыгы менен акча алмаштыруу бюролоруна 460 эскертүү кат жөнөткөн. Мыйзамды одоно бузганы үчүн 111 лицензиянын иши убактылуу токтотулуп, дагы 12 лицензия толук жоюлган.
Каржылык санкциялар расмий жана көмүскө алмаштыруу бюролоруна таасир этти:
- 112 акча алмаштыруу бюросуна 6.16 млн сомдук айып пул салынды;
- 152 жеке адамга 2.66 млн сомдук айып пул салынды, булар валютаны лицензиясыз алмаштырышкан.
Валюталык регулятор эгер кардарлардын арасынан шектүү аракеттер болсо же талаштуу кырдаалдар пайда болсо, алар арыз бере алаарын эскертет.
Арыздар 31-30-08 телефон номери аркылуу же mail@nbkr.kg электрондук почта аркылуу кабыл алынат.
