Кыргызстандын банк секторунда насыялар жана аманаттар 35%га өстү
Кыргызстандын банк тармагынын кредиттик портфели 460 млрд сомго жетип, 35%га өстү. Бул тууралуу Улуттук банктын расмий өкүлү Аида Карабаева "Биринчи радионун" эфиринде билдирди.
Карабаеванын айтымында, депозиттик портфель да 35%га өсүп, 804 млрд сомду түздү. Ошол эле учурда аманаттардын жана насыялардын негизги бөлүгү улуттук валютага туура келет.
Карабаева акыркы жылдары банк секторунун долларлаштыруу деңгээли олуттуу түрдө төмөндөгөнүн белгиледи.
"Насыялардын чет элдик валютадагы үлүшү: 2022-жылы 22% болсо, азыр 18%ды түздү. Ал эми доллар менен сакталган аманаттардын үлүшү 2022-жылдагы 45%дан азыркы учурда 34%га чейин азайган", - деди ал.
Мындай динамика калктын жана бизнестин сомго болгон ишениминин, ошондой эле жалпы эле банк системасына болгон ишенимдин өсүп жатканынан кабар берерин баса белгиледи.
