Евробиримдик: Кыргызстандын эки банкы санкциялар тизмесинен чыгарылышы мүмкүн
Ушул жылдын октябрь айында Евробиримдик Россияга каршы 19-санкциялар пакетин бекитип, ал Кыргызстандагы "Толубай" жана "Евразийский сберегательный банк" банктарына да тиешелүү болгон.
Ошондой эле тизмеге "Олд Вектор" жана "Гринекс" ЖЧКлары киргизилген. Эл аралык кызматташтык боюнча ЕБнин комиссары Йозеф Сикела бул банктар жана компаниялар ЕБнин Россияга каршы санкцияларын айланып өтүү коркунучуна байланыштуу тизмеге киргизилген.
"Аларды тизмеге киргизүү — Европалык биримдиктин Россияга карата санкцияларын айланып өтүү боюнча тынчсызданууларга байланыштуу. Тизмеден чыгаруу, албетте, мүмкүн; тиешелүү негиздер актуалдуулугун жоготкондо бул каралышы мүмкүн. Биз бардык чараларды үзгүлтүксүз карап чыгабыз жана кыргыз бийлиги менен конструктивдүү диалогду кубаттайбыз", — деди ал.
Йозеф Сикеланын белгилешинче, ЕБ Кыргызстандын Тышкы иштер министрлигинин эки банкка карата санкциялар киргизилгенден кийин көзкарандысыз аудит жүргүзүү өтүнүчүн кабыл алган.
"Кийинки кадамдар текшерилген далилдердин негизинде жана Евробиримдик процедураларын толук сактоо менен ишке ашат. Биз бүт процесс жүрүшүндө кыргыз бийлиги менен ачык жана конструктивдүү түрдө иштөөнү улантабыз", — деп жыйынтыктады ЕБнин эл аралык өнөктөштүк боюнча комиссары.
