Коммерциялык банктардын минималдуу капиталы 5 млрд долларга көтөрүлөт
Улуттук банктын башкармалыгы коммерциялык банктардын минималдуу капиталын көбөйтүү сунушун демилгеледи. Коомдук талкууга банктардын уставдык жана менчик (регулятивдик) капиталынын минималдуу көлөмү тууралуу жобонун долбоору чыгарылды.
Документ банк секторунун каржылык туруктуулугун күчөтүү, инвесторлор менен кардарлардын ишенимин арттыруу жана банктардын ички жана региондук рыноктогу атаандаштыкка жөндөмдүүлүгүн жогорулатуу максатында иштелип чыккан.
Регулятор жаңы түзүлгөн коммерциялык банктар, анын ичинде чет өлкөлүк банктардын филиалдары үчүн уставдык капиталдын минималдуу көлөмүн 5 млрд сом деңгээлинде бекитүүнү сунуштап жатат.
Иштеп жаткан банктар үчүн капиталды этап-этабы менен көбөйтүү пландалган:
- 2026-жылдын 1-июлунан — 1 млрд сом;
- 2027-жылдын 1-июлунан — 2 млрд;
- 2028-жылдан — 3 млрд;
- 2029-жылдан — 4 млрд;
- 2030-жылдан — 5 млрд сом.
Мындан сырткары, системалык мааниге ээ банктар үчүн өзгөчө талаптар киргизилет: алардын минималдуу капиталы келерки жылдын 1-июлунан 8 млрд сомдон кем болбошу керек.
Эгерде банк системалык мааниге ээ болуп калса, анда ал бир жыл ичинде уставдык капиталын талап кылынган деңгээлге жеткирүүгө милдеттүү. Ал эми менчик (регулятивдик) капитал үч айдын ичинде Улуттук банктан билдирүү алган соң толукталууга тийиш.
Ошондой эле иштеп жаткан банктардын 100% акцияларын сатып алган инвесторлор үчүн жаңы талап киргизилет: жаңы ээлер капиталды бир жылдын ичинде талапка ылайык деңгээлге жеткириши зарыл.
Демилгенин авторлорунун пикиринде, капиталдын көбөйтүлүшү банктардын каржылык туруктуулугун бекемдеп, кредиттик портфелдерди кеңейтүүгө, инвестицияларды жана жаңы акционерлерди тартууга, кардарлар жана контрагенттердин ишенимин арттырууга өбөлгө түзөт.
Улуттук банктын маалыматына ылайык, өлкөнүн банк системасынын активдери 2020–2025-жылдары бир кыйла өсүп, 276 млрд сомдон 1,13 трлн сомго жеткен. Ал эми быйыл октябрга карата банктардын таза кирешеси 23,1 млрд сомду түздү.
