Кыргызстандагы 98 000 жаран насыя алууга өзүнө-өзү тыюу салды
2025-жылдын 1-ноябрында жарандардын финансылык коопсуздугун камсыздоого багытталган жаңы механизм “Насыя алууга өзүнө-өзү тыюу салуу” системасы ишке киргизилген. Ошондон бери алдамчылардын курмандыгы болуудан сактанууну туура тапкан жарандардын саны күн санап өсүүдө.
Улуттук банктын басма сөз кызматынын маалымдагандай, 1-ноябрдан 19-декабрына чейинки мезгил аралыгында 98 003 адам «Түндүк» мобилдик тиркемеси аркылуу кредит алууга өзүнө-өзү тыюу салуу кызматын иштеткен.
Эске салсак, алдамчылыкты алдын алуу жана керектөөчүлөрдү коргоо максатында “өзүнө-өзү тыюу салуу” механизмин Улуттук банк жана Санарип министрлиги менен биргеликте киргизишкен.
Өзүнө-өзү тыюу салуунун жолу: «Түндүк» мобилдик кирүү → “Насыя алууга өзүнө-өзү тыюу салуу” кызматын тандоо → “Өтүнмө жиберүү” → Кредиттик бюрону тандоо → Иш-аракетти тастыктоо. Коргоо дароо активдүү болот. Кененирээк маалымат шилтемеде: https://www.youtube.com/watch?v=lW7gLxhcBhA&t=94s
