2000 сомдук эстелик банкнот түгөнсө, анын нумизматикалык баалуулугу жогорулайт
КРнын эгемендүүлүнүн 25 жылдыгына жана улуттук валютанын жүгүртүүгө чыгарылышынын 25 жылдыгына карата 2017-жылы КРУБ тарабынан 2000 сом номиналындагы алгачкы нумизматикалык эстелик банкноттор жүгүртүүгө чыгарылган.
Кыргызстандын тарыхындагы бул эстелик акчаны азыр элдер накталай сатып алууда гана колдонбостон баалуу белек катары да пайдаланышат. Азыркы учурда Улуттук банктын кассаларында 2000 сомдук нумизматикалык эстелик банкноттордун жаңылары жана ошондой эле бул банкнотко тиешелүү кутулар (фолдер) сатылууда. Бул тууралуу Улуттук банктын басма сөз кызматынан кабарлашты. Билдирүүгө караганда, эстелик банкноттор чектелген нускада даярдалган жана ал кайталанып чыгарылбайт.
“Алардын жүгүртүүдөгү саны банкноттордун запасы түгөнгөн сайын азаят жана эскилиги жеткенге чейин жүгүртүүдө колдонула берет. 2000 сомдук банкноттун запастары жокко чыкканда, бул акча кайталанып басып чыгарылбайт жана анын нумизматикалык баалуулугу жогорулайт” деп билдирген Улуттук банктын басма сөз кызматынан.
2000 сомдук банкнот дизайн жагында мыкты жетишкендиктери, көркөм контексте заманбап коргоо элементтеринин колдонулгандыгы, ошондой эле технологиялык жасалгалоо өзгөчөлүгү жана ишенимдүү коргоого алынгандыгы үчүн эл аралык сыйлыктарга ыйгарылган.
Билдирүүгө караганда, Улуттук банк тарабынан азырынча бул сыяктуу эстелик акча бирдигин чыгаруу иши каралган жок.
