Санарип финансылык технологиялар жана санарип төлөм жүргүзүү боюнча тегерек стол болду
Улуттук банк Эл аралык финансы корпорациясынын (IFC) көмөгү менен 2025-жылдын 22-декабрында Кыргыз Республикасында санарип финансылык технологияларды өнүктүрүүнүн негизги багыттарын талкуулоого арналган тегерек стол өткөрдү. Бул тууралуу Улуттук банктын басма сөз кызматынан кабарлашты.
Иш-чарага «Кыргызстан банктарынын союзу» бирикмесинин, коммерциялык банктардын, Виртуалдык активдер рыногунун катышуучулары ассоциациясынын, Төлөм системаларынын операторлору жана төлөм уюмдары ассоциациясынын өкүлдөрү, ошондой эле IFC жана Швейцариянын КРдагы элчилигинин өкүлдөрү катышты.
Тегерек стол маегинин жүрүшүндө санарип финансылык технологиялар, анын ичинде санарип төлөмдөр жана инновациялык төлөм чечимдерин, финансы рыногунун инфраструктурасын өнүктүрүү, ошондой эле IFCнын QR-төлөмдөрдү изилдөө чөйрөсүндө учурда ишке ашырылып жаткан долбоорлор жана тенденциялар көрсөтүлдү.
Анын жүрүшүндө Улуттук банктын Башкармасынын мүчөсү С.К. Абдыгазиев заманбап финансылык технологияларды ишке киргизүү максатында Улуттук банк жөнгө салуучу жана институционалдык шарттарды түзүп жаткандыгын белгиледи. Ошондой эле ал бардык кызыкдар тараптар – жөнгө салуучу, банктык жана банк эмес уюмдар, финтех-компаниялар, IT-коомчулугу жана академиялык чөйрө өз ара тыгыз иш алып баруусу маанилүү экендигине көңүл бурду.
Жолугушуунун жыйынтыгында катышуучулар Кыргыз Республикасынын технологиялык жактан өнүккөн жана туруктуу санарип финансы экосистемасын ырааттуу түзүү үчүн бардык кызыкдар тараптар туруктуу негизде тыгыз иш алып баруусу жана иш-аракеттерин координациялоосу маанилүү экендигин белгилешти.
