ELQR системасы аркылуу операциялардын саны 54,5 эсеге өстү
КРнын Улуттук банкынын төрагасы Мелис Тургунбаев 2025-жылдагы Улуттук банктын ишмердүүлүгү, жетишкен жаңычылыктар жана алдыга койгон пландар тууралуу бөлүштү.
КРУБ төрагасы 2025-жыл Кыргызстандагы жалпы каржы тутуму үчүн мазмундуу жана абдан маанилүү жыл болгондугун белгилеп, жарандын кызыкчылыгына түздөн-түз таасир эткен чечимдер чыгарылгандыгын билдирди.
“2025-жылы ар башка банктардагы эсептер ортосундагы которуулар үчүн комиссияларды толук жоюу болду. ELQR системасы аркылуу операциялардын саны 54,5 эсеге, ал эми төлөмдөрдүн көлөмү дээрлик 85 эсеге өстү. 2025-жылдын биринчи жарым жылдыгында эле QR-коддор аркылуу 274,9 млрд сом өткөн — бул өткөн жылдын ушул мезгилине салыштырмалуу 20 эсеге көп” -деп белгиледи Тургунбаев.
Мындан сырткары, ал 2025-жыл санарип сомдун — улуттук валютанын үчүнчү формасынын мыйзамдык жактан бекитилген жылы болгондугун билдирди. Анын айтымында, анын ишке кириши тез жана коопсуз эсептешүүлөрдү камсыздап, аймактарда каржылык кызматтарга жеткиликтүүлүктү кеңейтет жана жаңы санарип кызматтар үчүн технологиялык негиз болуп берет.
