Азия инфраструктуралык инвестициялар банкы Кыргызстанга 50 млн доллар бөлөт
Финансы министрлиги Жогорку Кеңештин финансы, бюджет, ишкердик жана атаандаштыкты өнүктүрүү боюнча комитетинин жыйынында Кыргызстан менен Азия инфраструктуралык инвестициялар банкынын ортосундагы кредиттик макулдашуунун долбоорун тааныштырды.
Финансы министринин орун басары Нурбек Акжоловдун айтымында, Дүйнөлүк банк буга чейин 120 млн доллар бөлгөн "Кыргыз Республикасында микро-, чакан жана орто ишканалар үчүн туруктуу финансылык рынокту өнүктүрүү" долбоорунун алкагында Азия инфраструктуралык инвестициялар банкы кошумча 7,3 млрд жапон йенин, башкача айтканда 50 млн доллар бөлөт.
Кредит 32 жылдык мөөнөткө берилет, анын ичинен 7 жыл 6 айы өзгөрмө пайыздык чен менен каралган. Министрдин орун басарынын айтымында, пайыздык ставка 1%ды түзөт.
Чиновниктин белгилешинче, бул каражаттар чакан жана орто бизнеске "жашыл долбоорлорду" колдоо максатында берилет. 100 миң сомдон 50 млн сомго чейин болгон насыялар ишкерлерге 5 жылдык мөөнөткө, жылдык 8% менен берилмекчи.
Нурбек Акжолов Дүйнөлүк банк бөлгөн 120 млн долларлык каражаттар февраль айынын башынан тартып ишкерлерге бериле баштаганын билдирди.
