Кыргызстандын эки банкы Евробиримдиктин санкциясына кабылышы мүмкүн
9-февралда Евробиримдик (ЕБ) Россияга каршы санкцияларды кеңейтүүнү сунуштап, алардын курамына Россиянын мунайы өтүп жаткан Грузия менен Индонезиянын портторун киргизүүнү сунуштады. Ошондой эле Россияга криптоактивдер тармагында кызмат көрсөтүп жаткандыгы үчүн санкциялык тизмеге Кыргызстандын эки банкы — «Керемет Банк» ААК жана «Капитал Банк» ААК кошуу каралган. Бул тууралуу эл аралык Reuters МАнен кабарлашты.
Билдирүүгө караганда, бул чаралар Россиянын Украинага каршы согушуна байланыштуу ЕБтин 20-санкциялык пакетинин бир бөлүгү болуп саналат. Пакет ЕБнин дипломатиялык кызматы, Европа тышкы аракеттер кызматы (EEAS) жана Европа комиссиясы тарабынан биргелешип иштелип чыгып, кече күнү ЕБ өлкөлөрүнө сунушталган. Санкцияларды мыйзам катары кабыл алуу үчүн ЕБде бир добуштан чечим кабыл алынышы талап кылынат.
Сунушта үчүнчү өлкөгө карата санкцияларды айланып өтүүгө каршы инструментти биринчи жолу колдонуу каралган. Жаңы чектөөлөр Кыргызстанга металл иштетүүчү станокторду жана үн, сүрөт жана маалыматтарды берүүчү байланыш каражаттарын — мисалы, модемдерди жана маршрутизаторлорду сатууга тыюу салат.
ЕБ ошондой эле Лаос жана Тажикстандагы банктарды санкциялык тизмеге кошууну, ошол эле учурда Кытайдын эки банкын тизмеден чыгарууну сунуштады. Эгер сунуш жактырылса, жогоруда аталган банктарга ЕБдеги жеке жана юридикалык жактар менен операцияларды жүргүзүүгө тыюу салынат.
Европа тышкы аракеттер кызматы санкциялык тизмеге 30 жеке адамды жана 64 компанияны кошууну да сунуштады.
