Улуттук банк эсептик ченди 12% жогорулатты
КРнын Улуттук банк Башкармасы 2026-жылдын 23-февралында эсептик ченди 100 базистик пунктка 12,00 пайызга чейин жогорулатуу чечимин кабыл алып, бул чечим бүгүндөн баштап күчүнө кирди.
Мындай маалыматты бүгүн Улуттук банктын төрагасынын орун басары Азат Козубеков басма сөз жыйынынын жүрүшүндө билдирди. Анын айтымында, тышкы экономикалык чөйрөдө абал бир калыпта болбой, мурдагыдай эле белгисиздик жагдай жогору бойдон калууда.
“Дүйнөлүк азык-түлүк рынокторунда товарлардын негизги түрлөрүнө баалардын өсүш арымынын акырындык менен басаңдашы байкалууда, бирок КРнын соода боюнча өнөктөш өлкөлөрүндө инфляция жогору бойдон сакталып турат. Айтсак, РФда инфляциянын деңгээли 5,9%, Казакстанда 12,2%, Өзбекистанда 7,2% болуп турат. Жалпысынан инфляция глобалдуу проблема болуп саналат. Ошондуктан аны менен аймактар бардык өлкөлөр кездешип жатат. Биздин көз карашыбыз боюнча эсептик чендин 12% тегерегинде кармалышы КРнын экономикасы үчүн оптималдуу шарт болуп саналат. Бул орто мөөнөттүү келечекте инфляциялык фондо биздин максаттарга жетүүгө, инфляциянын деңгээлин 5,7% кармоого жардам берет” – деп билдирди, Козубеков.
2026-жылдын январь айында өлкөнүн реалдуу ИДӨсү 9,0% өскөн. Экономикалык жигердүүлүк, мурдагыдай эле кызмат көрсөтүүлөр жана курулуш секторунда белгиленген. Негизги капиталга инвестициялар жогору деңгээлде сакталып турууда, бул инфраструктуралык долбоорлордун кеңейишине түрткү берет. Ал эми калктын реалдуу кирешесинин өсүшү жана керектөө кредиттеринин көбөйүшү ички суроо-талапка өбөлгө түзүп жатат.
Улуттук банктын төрагасынын орун басарынын айтымында, экономикада инфляцияга түрткү берүүчү факторлордун пайда болушунун, ИДӨдөгү ажырымдын көбөйүшүнүн жана керектөө суроо-талабынын өсүшүнүн натыйжасында, бүгүнкү күндө инфляциянын басаңдашы үчүн туруктуу шарттарды түзүү максатында акча-кредит шарттарын катуулатуу зарыл болду. Ушуга байланыштуу Улуттук банктын эсептик ченинин өлчөмү 12,00 пайызга чейин жогорулатылды.
