Касымалиев Дүйнөлүк бажы уюмунун башчысы менен жолукту
Бүгүн Министрлер кабинетинин төрагасы Адылбек Касымалиев Дүйнөлүк бажы уюмунун Башкы катчысы Ян Сондерс менен жолугушту. Бул тууралуу мекеменин басма сөз кызмат кабарлады.
Маалым болгондой, тараптар бажылык жөнгө салуунун эл аралык стандарттарын киргизүү, процесстерди санариптештирүү, чек ара инфраструктурасын модернизациялоо жана кадрларды даярдоо маселелерин талкуулашты.
Касымалиев Кыргызстан уюмга 2000-жылдын 10-февралынан бери мүчө экенин, уюм улуттук бажы кызматынын дараметин жогорулатууда чоң роль ойноп келгенин белгиледи. Ал ошондой эле "Смарт Бажы" санарип платформасы, электрондук декларациялоо жана тобокелдиктерди башкаруу боюнча реформалар тууралуу маалымат берди.
Ян Сондерс Кыргызстандын бажы жол-жоболорун санариптештирүүдөгү жыйынтыктарына жогорку баа берип, уюм мындан ары да колдоого даяр экенин билдирди.
Жолугушуунун соңунда Касымалиев эл аралык бажы кызматташтыгын өнүктүрүүгө кошкон салымы үчүн Ян Сондерске Министрлер Кабинетинин Ардак грамотасын тапшырды.
