Адылбек Касымалиев банк кызматкерлерин кесиптик майрамы менен куттуктады
Министрлер Кабинетинин төрагасы Адылбек Касымалиев банк секторунун кызматкерлерин кесиптик майрамы менен куттуктады.
Куттуктоосунда ал бул күн улуттук валюта — кыргыз сомунун жүгүртүүгө киргизилиши менен тыгыз байланыштуу экенин белгилеп, анын өлкөнүн эгемендүү финансы системасын калыптандыруудагы маанисине токтолду.
Адылбек Касымалиев акыркы жылдары өлкө экономикасы туруктуу өнүгүү жолуна түшүп, ички дүң продуктунун көлөмү эки эседен ашык өскөнүн белгиледи. Анын айтымында, банк секторунда да капиталдаштыруу, кредиттик портфель жана таза киреше көрсөткүчтөрү өсүүдө.
Ошондой эле ал 2030-жылга чейинки Улуттук өнүктүрүү программасында экономиканы эки эсеге көбөйтүү максаты коюлганын айтып, бул процессте банктардын ролу чоң болорун билдирди.
Министрлер Кабинетинин төрагасы банк кызматкерлеринин кесипкөйлүгүн, жоопкерчилигин жана санариптик трансформация шартындагы эмгегин өзгөчө белгилеп, алардын өлкөнүн финансы системасын өнүктүрүүгө кошкон салымын жогору баалады.
Сөзүнүн соңунда Адылбек Касымалиев банк кызматкерлерине бекем ден соолук, ийгиликтер жана бакубат жашоо каалады.
