Улуттук банк коммерциялык банкка 65 миң сом айып пул салды

Кыргыз Республикасынын мыйзамдарынын жана Улуттук банктын керектөөчүлүк кредиттөө чөйрөсүндөгү ченемдик укуктук актыларынын талаптарын бузгандыгы үчүн өлкөдөгү бир коммерциялык банкка 65 миң сом айып пул салынды.

Бул тууралуу Кыргыз Республикасынын Улуттук банкынын басма сөз кызматынан маалымдашты. Берилген маалыматта банктын аталышы жана мыйзам бузуу кайсы талаптарга байланыштуу болгону такталган эмес.

Кыргыз Республикасынын аймагында иш алып барган коммерциялык банктардын тизмесине ылайык, азыркы тапта 26 коммерциялык банк жана алардын филиалдары иш жүргүзөт. Алардын ишмердүүлүгүн Улуттук банк дайыма көзөмөлгө алып турат.