Бишкектеги төрт акча алмашуу бюросуна карата чара көрүлдү
КРнын мыйзамдарын жана Улуттук банктын ченемдик талаптарын бузгандыгы үчүн Бишкектеги алмашуу бюролоруна чара көрүлдү. Бул тууралуу Улуттук банктын басма сөз кызматынан кабарлашты.
Маалыматка караганда, алардын бири «Жанай Кэш» ЖЧКнын Манас проспектиси, 59-үй, 2-батир дарегинде жайгашкан алмашуу бюросунун лицензиясынын аракети убактылуу токтотулду.
Мындан тышкары, Бишкек шаарындагы үч алмашуу бюросунун ар бирине 55 миң сомдон айып пул салынды.
Улуттук банк бул чаралар мыйзамдардын жана регулятордун ченемдик укуктук актыларынын талаптарын бузууга жол берилгендигине байланыштуу кабыл алынганын белгиледи.
Улуттук банктын алмашуу бюролорунун 2026-жылдын 28-августуна карата абалы боюнча реестрине ылайык, Кыргызстанда азыр жалпы 894 алмашуу бюросу ишмердүүлүк жүргүзүп жатат.
