2026-жылдын биринчи жарым жылдыгында финансы секторунун кирешеси 166,8 млрд сомду түздү
КРнын Улуттук статистика комитетинин маалыматына ылайык, 2026-жылдын январь-июнь айларында өлкөнүн финансы секторундагы уюмдардын кирешеси 166,8 млрд сомду түздү. Бул 2025-жылдын ушул мезгилине салыштырмалуу 62,7 млрд сомго же 60,3%га көп.
Бул мезгилде финансы секторунун жалпы чыгымдары 102,6 млрд сомду түзүп, былтыркы жылдын биринчи жарым жылдыгына салыштырмалуу 37,4 млрд сомго же 57,4%га өскөн.
Натыйжада сектордун сальдолоштурулган финансылык жыйынтыгы 64,1 млрд сомду түздү. Бул 2025-жылдын январь-июнь айларындагы көрсөткүчтөн 25,2 млрд сомго же 64,9%га көп.
Статистика комитетинин маалыматы боюнча, өлкөнүн финансы секторунда Улуттук банк, 26 коммерциялык банк, 138 банктык эмес финансылык-кредиттик уюм жана 19 камсыздандыруу уюму иш алып барууда. Сектордо иштегендердин саны 32 миңден ашат.
Ошондой эле кардарлардын саны 26 млн ашып, бир жыл ичинде 6,8 млн же 34,6%га көбөйгөн.
