Улуттук банкта санариптик активдердин коопсуздугу талкууланды
9-сентябрда Улуттук банкта коммерциялык банктардын өкүлдөрү үчүн "Санариптик активдер: коопсуздук, комплаенс жана көзөмөл" аттуу воркшоп өттү. Бул тууралуу мекеменин басма сөз кызматы билдирди.
Маалымдалгандай, иш-чарага блокчейн-технологиялар жана санариптик активдердин коопсуздугу боюнча эл аралык компаниялардын бири болгон CertiK компаниясынын өкүлдөрү катышты. Воркшоп Улуттук банк менен CertiKтин өз ара түшүнүшүү жөнүндө меморандумунун алкагында өткөрүлдү.
Катышуучулар санариптик активдердин коопсуздугу, транзакцияларга мониторинг жүргүзүү, AML/KYT-комплаенс, виртуалдык активдерди жөнгө салуу, лицензиялоо жана көзөмөлдөө боюнча эл аралык тажрыйбаны талкуулашты.
Ошондой эле смарт-келишимдерди, кастодиалдык чечимдерди жана финансылык уюмдардын мониторинг системаларын коргоо маселелери каралды.
