Ишкердикти өнүктүрүү фонду ири суммадагы насыяларды берүү мүмкүнчүлүгүнө ээ болот
КРнын Улуттук банкы “Ишкердикти өнүктүрүү фонду” ААКсын микрокредиттик компаниядан (МКК) микрофинансылык компанияга (МФК) кайра түзүүгө макулдук берди. Бул тууралуу Улуттук банктын Юстиция министрлигине жөнөткөн расмий катында белгиленген.
Ишкердикти өнүктүрүү фондунун маалыматына ылайык, кайра түзүлүү процесси толук аяктагандан кийин фонд берилүүчү насыянын максималдуу суммасын көбөйтүү мүмкүнчүлүгүнө ээ болот.
Насыялоо мүмкүнчүлүктөрүнүн кеңейиши чакан жана орто ишкердик субъекттерине каржылык колдоону күчөтүүгө, ири көлөмдөгү каржылоого жеткиликтүүлүктү камсыз кылууга шарт түзөт. Ошондой эле иштеп жаткан бизнести өнүктүрүүгө, өндүрүштү модернизациялоого жана инвестициялык долбоорлорду ишке ашырууга кошумча мүмкүнчүлүктөр пайда болот.
"Ишкердикти өнүктүрүү фонду" микрокредиттик компаниясы ААКнун негизги милдеттери болуп: - жакырчылыкты жоюуга көмөктөшүү, иш менен камсыз кылуу деңгээлин жогорулатуу үчүн калкка микрокаржылоо боюнча жеткиликтүү кызматтарды көрсөтүү; ишкердикти өнүктүрүүгө жана республиканын калкын социалдык мобилизациялоого көмөктөшүү; микрокредиттик компаниянын андан ары иштешинин натыйжалуулугун жогорулатуу үчүн шарттарды түзүү болуп саналат.
