Балыкчыдагы жол салуудагы мүчүлүштүктөр подрядчылардын эсебинен жоюуда
Курулуш, архитектура жана турак жай-коммуналдык чарба министрлигине караштуу Мамлекеттик архитектура-курулуш контролдоо департаментинин Ысык-Көл региондук башкармалыгы Балыкчы шаарындагы тротуарларды реконструкциялоо иштеринин сапатына көзөмөл жүргүзүүдө.
Аталган министрликтин маалыматына караганда, буга чейин Абдрахманов, Кулакунов жана Тоголок Молдо көчөлөрүндөгү тротуарларды оңдоо иштеринен кемчиликтер аныкталган. Ушуга жараша “Капитал Консалтинг Компани”, “Чу Прокси” жана “4 Энерджи” ЖЧКлары административдик жоопкерчиликке тартылган. Алар аныкталган кемчиликтерди өз каражаттарынын эсебинен жоюшу талап кылынган.
Билдирүүгө ылайык, азыр подряддык уюмдар кемчиликтерди жоюу иштерин жүргүзүшүүдө. Тактап айтканда, асфальт төшөлүүчү негиз тазаланып, битум эмульсиясы колдонулууда. Андан соң курулуш ченемдерине ылайык, калыңдыгы 4 сантиметр болгон асфальт-бетон катмары төшөлмөкчү.
Аткарылып жаткан иштердин сапаты жана курулуш ченемдеринин сакталышы Ысык-Көл региондук мамлекеттик архитектура-курулуш контролдоо башкармалыгынын адистери тарабынан көзөмөлдөнүп жатат.
