Улуттук банк эки төлөм уюмуна 6 млн сомдон ашуун айып салды
Кыргыз Республикасынын Улуттук банкынын Көзөмөл комитети эки төлөм уюмунун жана төлөм системасынын операторунун мыйзам бузууларын аныктады. Бул тууралуу мекеменин маалымат кызматы кабарлады.
Маалыматка караганда, текшерүүдө алар кылмыштуу кирешелерди адалдоого жана каржылоого каршы мыйзамдарды бузган.
Биринчи уюмга 5 млн 381 миң 247 сом айып салынган. Буга эл аралык электрондук акча которууларда кардарды талаптагыдай текшербей койгону себеп болгон.
Экинчи уюмга 804 миң 130 сом айып салынды. Ал иштиктүү мамиле түзүүдө жана эл аралык которууларда кардарды текшерүү тартибин бузган.
Жалпы айыптын суммасы 6 млн 185 миң сомдон ашты.
Төлөм уюму — банк болуп саналбаган, бирок төлөмдөрдү кабыл алуу, иштетүү жана төлөм кызматтарын көрсөтүү менен алектенген юридикалык жак болуп саналат. Мындай уюмдар жарандарга жана ишканаларга ар кандай төлөмдөрдү жүргүзүүгө мүмкүнчүлүк берет. Кыргызстанда алардын ишмердүүлүгү Улуттук банк тарабынан жөнгө салынып, атайын лицензиянын негизинде жүргүзүлөт.
