Улуттук банк эсептик ченди 12% деңгээлинде калтырды
Улуттук банк эсептик ченди 12 % деңгээлинде өзгөртүүсүз калтырды. Тиешелүү чечим 26-октябрда кабыл алынып, бүгүн, 27-октябрда күчүнө кирди. Бул тууралуу Улуттук банктын төрагасынын орун басары Азат Козубеков билдирди.
Анын айтымында, Кыргызстанда акыркы айда инфляциянын өсүү темпи басаңдаган. Октябрь айында жылдык инфляция сентябрдагы 12,2 %дан 10,8 %га төмөндөгөн. Ал эми жыл башынан берки инфляция 8,5 %ды түзгөн.
Өлкөдө баалардын өсүшүнө Жакынкы Чыгыштагы кагылышуулардан улам дүйнөлүк азык-түлүк жана чийки зат рынокторундагы баалардын өзгөрүшү таасирин тийгизүүдө. Ошол эле учурда Улуттук банктын акча-кредит саясаты жана өкмөттүн инфляцияга каршы чаралары баалардын өсүшүн басаңдатууга көмөктөшүүдө.
Мындан тышкары, 2026-жылдын тогуз айында Кыргызстандын реалдуу ички дүң продукциясы 10,8 %га өскөн. Буга курулуш тармагындагы инвестициялардын көбөйүшү, калктын кирешесинин жогорулашы, ички керектөөнүн артышы жана туризм тармагы түрткү болгон.
Улуттук банк инфляцияны орто мөөнөттүү келечекте 5-7 % деңгээлине жеткирүү максатында эсептик ченди өзгөртүүсүз калтырган. Зарыл учурда акча-кредит саясатына өзгөртүүлөр киргизилиши мүмкүн.
Эсептик чен боюнча кийинки пландуу отурум 30-ноябрда өтөт.
