Тогуз-Тородо 3 миң гектардан ашык жерди сугаруу үчүн 2 канал куруу пландалууда
Тогуз-Торо районунда жалпы 3 миң 256 гектар жерди сугат суу менен камсыз кылууга багытталган эки каналдын курулушу пландалууда. Бул тууралуу өлкө лидери Садыр Жапаровдун 26-октябрдагы иш сапары учурунда маалымдалды.
Билдирүүгө караганда, анын бири - 800 гектар жерди сугарууга мүмкүндүк бере турган "Кара-Талаа" каналы. Долбоордун алдын ала наркы 400 млн сомду түзөт.
Мындан тышкары, 2 миң 456 гектар жерди сугарууга багытталган "Ак-Күп" каналын куруу каралууда. Анын биринчи этабына 440 млн сом, экинчи этабына 560 млн сом талап кылынат.
Жалпысынан эки долбоордун болжолдуу наркы 1 млрд 400 млн сомду түзөт.
Белгилей кетсек, райондун ирригация тармагына 2021–2025-жылдары 15,5 млн сом жумшалган. Ал эми 2026-жылы кошумча 10,5 млн сом бөлүнгөн.
